如何「做自己」

對於「做自己」呢件事，我係鼓勵人做返自己的，因為做自己係你最為擅長嘅事，要有所成就亦會事半功倍。

但「做自己」嘅同時，唔好忽略咗呢個「自己」係隨歲月、經歷、學習、事件、領悟等等，每時每刻都可以唔同。

我發現好多追求「做自己」嘅人，會同時排斥咗「令自己進步」呢個意念，佢哋認為做自己，就等同於保持一成不變嘅自己。

呢種所謂嘅「做自己」根本只係沉迷於「做昨日嘅自己」，容許自己不改變，甚至係刻意唔畀自己改變。

的確，改變不一定帶來進步，但刻意不改變，就係放棄進步嘅機會。

容許自己進步，追求更好嘅自己，然後做返一個「比昨天進步嘅自己」，都係做緊自己。

唔好畀「做自己」變成拖累自己成長嘅口頭禪，你係可以做自己嘅同時，成為一個每日都更好嘅自己。