修習日本東密真言宗的機緣

2025年2月9日

初九啟市後，呢幾日客人上來拜年，如果我睇到對方嘅「氣」有特別之處，會回禮贈言。好幾位有每年搵相熟師傅睇流年嘅，都話我同師傅所言一致。

以前我主要係遍向以西方能量體系，加上應用心理學與行為科學，再輔以我嘅人生體會與顧問經驗，配合對方嘅現況與承受力及心靈狀態，去運算出適合對方嘅建言。

修習日本東密真言宗之後，漸漸係跨過咗以上嘅複雜計算，我可以觀察同感受到對象嘅「氣」，然後直接「知道」一啲事嘅走向。

真言宗係我初次深入學習嘅佛教宗派，喺當中我發現好多與我過去所學包括：因果、能量、顯化、宇宙觀等見解，都相當吻合，有種互為一體，相輔相成，並且昇華咗嘅感覺。由最初的嘗試體驗，到後來慢慢感受到其精妙之處，我發現到越來越大嘅智慧與奧妙在其中。

大約一年幾前，其中一位真言宗前輩，佢係一位老中醫，知道我的職業，以及知道我的體質與幾年間所受到的職業傷害之後，教導我如何喺助人之路上走得更順。佢先係教我，以人嘅力量去幫助別人，可以，但力量有限，而且會耗損自己，咁樣唔長久。

呢個係佢行醫數十年嘅經驗。

之後，佢再教我其實可以借天地之力，以大宇宙(即大自然)嘅能量，以自身負責引動和調動，就能夠起到更大嘅作用，又減輕對自身嘅負擔，咁先可以順同長久。

呢個係佢修習真言宗嘅經驗。

一直以來，「密宗」對我來講係好神秘同遙不可及嘅一回事，但機緣就係咁奇妙，我由一位求醫者，變成一位求道者，亦令我喺事業上得到突破，助人助己。

感恩宇宙，安排我成為一個有緣人。

合掌
南無大師遍照金剛

一石堂主
2025年2月9日